حمد قلم: لماذا الاعتراض على زواج المشاهير مع إن شغلهم كأي شغل آخر؟

ليش اخترت اسم "حمد قلم"؟

مع حمد قلم اسم مرتبط مع طفولتي كونه اسمي حمد، وكان في درس يعطونه الطلبة في مدارس الكويت كلها اسم الدرس "مع حمد قلم" ولهذا السبب كل أهلي كان ينادوني فيه أثناء دراستي في الجامعة وكلية الإعلام وفي مواد كانوا يدربونا فيها على الصحافة فطلبوا مني مقالة أكتبها ولازم كل مقالة لها عامود فإخترت عامود اسمه مع حمد قلمواستخدمت هذا الاسم لان يعني مرتبط في الماضي و يربط أجيال مع بعض والقلم حلو حقي لأن أنا وايد أحب أكتب بالقلم ما أحب التكنولوجيا فكل افكاري وكل كتاباتي والخطط أكتبها بالقلم.

ما مدى تأثير السوشيال ميديا على عائلتك؟

عايلتي والله مستانسين يعني أنا اليوم اهما صايرين فريق عملي ومشجعيني فدائماً يفرحون على التعليقات الي قاعده تنكتب لي، فرحانين فيني والشي الثاني صاروا اهما عيني المركبه بالسوشيال ميديا، أمي وأبوي شي ما تتخيله معاي بكل شي اهما فاهميني يفرحون معاي، يوجهوني عندي رقابه أنا منهم قبل الرقابه، واجهتني أول شي انتقادات إن شلون تطلع أهلك في الميديا إحنا نحب الجمعه نحب الناس، على فكره أنا ترى أعزم المتابعين والفانز عندي في البيت في زوارة الفيحاء وايد ناس اييوني، وبيتي مفتوح حتى الناس استغربوا كانوا قاعدين يقولولي يعني ما تخافون من العين، مثلاً يوم القرقيعان هذا الشي يفرحني ويفرح أهلي.

هل راح يكون في موسم ثالث حق حمد شو؟

في دور الإعداد بس إن شاء الله فيه، كل شي بوقته حلو.

شلون كان تعاملك مع النجوم الكبار، ومنو الي حسيته سلس معاك خلف الكواليس بالبرنامج؟

شوف يعني هذي اعتقد انطباع إحنا سمعناه بس أنا شفت العكس الي اهما مثلاً صعبين في التعامل أنا حسيت العكس، كلهم أنا اتصلت فيهم شخصياً و أنا طلبتهم و شرحتلهم بدون أي حواجز بدون أي مدير اعمال، بدون أي شركات، فكنت واضح معاهم، نوال الكويتيه أنا بالنسبه لي هذا أجمل و أحلى لقاء و صداقتنا للحين مستمره تكلمني و كلمها متواصلين بشكل وايد كبير اهي فرحانه في اللقاء، وأنا هم فرحان فيه لأن كنا على طبيعتنا قاعدين نسولف وطلعت الحلقة ناجحه.

في نجم حاولت تستضيفه واستفزك مثلً بردّه؟

لا.. لا ماعندي جذي بس عندي ناس شروطهم تعجيزيه كانت بالنسبه لي كأرقام فلكيه مثلاً أو إن شروط في عالم ثاني، بس عندي قائمه جديدة جاهزه حق الموسم الياي او حتى المواسم اليايه، بس يعني أكيد أنا في بالي أسامي ودي استضيفهم وأيضاً في فنانين بالعكس طلبوا وكانوا يتصلون علينا يطلبون يطلعون لقاء معانا، والبرنامج أخذ صدى حلو.

حمد إذا انت ناوي تتزوج راح تتزوج زواج عن حب و لا زواج أهل؟ وهل ممكن تكون مشهوره؟

لا هذي و لا هذي أنا مو مؤمن إن زواج الحب يوصّل لي النجاح، هم نفس شي بالنسبه لزواج الأهل أنا مو قاعد أفكر شلون على كثر مو قاعد أفكر منو .. ترى سؤال وايد صعب (مشهوره) لحظه خل أفكر أنا والله ماعندي مشكله أنا المشكله منو مادري، تصدق مادري ليش معترضين على زواج المشاهير مع إن هذا الشغل كأي شغل آخر كالدكتورة والموظفة أهم شي الشخصية وإذا كان في انسجام وتوافق.

انزين حمد هل انت معه أو ضد ان مثلاً واحد من المشهورين يطلع مع شخصيه ويسوون ثنائي مع بعض بالسوشيال ميديا؟

الناس تحب القصص و تحب الشي الغير مألوف أنا علاقاتي مع الكل زينه، الكل طلعت معاهم تقابلنا في احتفالات اجتماعية وأيضاً في الاعلانات.

متى أمك تزعل عليك أو شنو الشي إذا سويته يزعلها؟

ماتحب تشوفني زعلان أو متضايق هذا الشي كبيرعندها فتحاول كثر ماتقدر تطلعني من هذا الشي.

متى حمد يضايق متى يزعل؟

احب الناس تشوفني مستانس و سعيد لان أحس هذا الشي يعكس، ما أطلع ويهي الثاني بس أنا في حياتي الطبيعية وايد عصبي بس ما أظهر هذا الشي للناس أنا أحب كل شي يكون ممتاز و يخلص بسرعه، أضايق إذا الشخص الجدامي ما فهمني، إذا في شي ودي أسويه ماقدرت أحققه.

منو تحس ربحه أكثر بالدعايات من المشاهير البنات و لا الشباب؟

البنات انا اشوف انواع الاعلانات الي يحطونها بشكل وايد مختلف عن الشباب فاشن وبيوتي و مكياج، نوعية الاعلانات عند البنات أكثر فأكيد اهما يطلعون فلوس أكثر.

شنو الرساله الي تسعى توصلها بالسوشيال ميديا؟

ماكو رساله وحده أنا بالنهايه دايماً أحب أشوف الناس سعيده، أغير طريقة تفكيرهم ونظرتهم للحياة ايجابين، علاقاتهم مع الناس، أحب الشخص يكون عنده طموح أحب الشخص يسعى حق رزقه ونجاحه، يسعى حق مسؤولية يعني لحلم يبي يحققه أحب أوصل رسالة إن الشخص يكون على طبيعته بكلامه بتصرفاته بلبسه، مشكلتنا أنا أشوفها اهني وايد ناس تلبس شي قناع مو قناعها وايد مشكله كبيره.

انا ما أشوفك وايد داش بالأزياء؟

لا، شوف أنا من ضمن شخصيتي ان ما اشوف شكلي قبل لا أطلع ما يهمني شنو اللبس أهم شي أكون لابس شي مريح، بس حزة المناسبات أو التصوير اهني لازم أكون أنا لابس شي مرتب، فريق عملي وايد يحاول يغير فيني الشخصية، بسانا أحس وايد مرتاح جذي أحب البس أشياء تريحني، أحب وايد اللون الأسود خزانتي نصها أسود، مو إلا أمشي على الموضه، بالعكس أنا يمكن أسوي موضتي بنفسي ماعندي مشكله أشياء الي أحبها أسويها.

منو الشخصيه الي تأثرت فيها بالبرنامج؟

نوال الكويتيه، فتحيه عجلان حبيتهم وايد أغلب الي استضفتهم للحين عندي تواصل معاهم، وللعلم ان سنة كاملة بس لإقنع هيا عبدالسلام وزوجها فؤاد علي بالظهور معاي في البرنامج.